Bernadette Sembrano : "Hulog ng Langit"

The Philippine Star

Sunday, 13 April 2008

Ilang tao na naman ang matutulungan at ilang buhay na naman ang magbabago sa paglulunsad ng public service segment ng ABS-CBN News and Current Affairs sa TV Patrol World at Umagang Kay Ganda sa pamamagitan ng Hulog ng Langit ni Bernadette Sembrano.

Matapos ang matagumpay na Nagmamahal Kapamilya, muling nagbabalik sa serbisyong publiko si Bernadette sa naturang segment na naglalayong pag-ugnayin ang mga taong lubos na nangangailangan sa mga taong may kakayahang magbigay ng hinihinging tulong nila.

“Napakadami ng taong nangangailangan ng tulong at napakadami rin ng taong handang tumulong. Ang Hulog ng Langit ang magsisilbing tulay sa pagitan nilang dalawa nang sa gayo’y sila ay magkaroon ng ugnayan,” paliwanag ni Bernadette.

Dahil na rin sa angking kredibilidad at imahe ng pagiging isang compassionate na reporter kung kaya’t napili si Bernadette bilang bagong mukha ng ABS-CBN public service.

“Kilala na talaga si Bernadette bilang babaeng may busilak na puso sa pagtulong sa mga nangangailangan. Bilang reporter, nabuo na niya ang kredibilidad sa aspetong ito kaya naman bagay na bagay siyang kumatawan sa public service efforts ng ABS-CBN,” sabi ni ABS-CBN Head of Current Affairs and News Production Luchi Cruz-Valdes.

Nagsimula na ang Hulog ng Langit noong Lunes kung saan ipinakita ang kuwento ni Baby Raiza, isang bagong silang na sanggol na kailangan sumailalaim sa maselang operasyon upang matanggal ang tila ba di nabuong kakambal sa kanyang likuran. Dala ng kakulangan sa kagamitan sa Magsaysay District Hospital Sa Quezon, kung kaya’t minabuti ng dalhin ng Hulog ng Langit team ang bata sa Philippine Children’s Medical Center sa Quezon City para sa mas mabusisi pang mga eksaminasyon.

Sasamahan ni Bernadette ang mga TV Patrol World anchors na sina Karen Davila, Julius Babao at Ted Failon at iba pang segment hosts tulad nina Kim Atienza at Phoemela Barranda. Mapapanood ang segment 2-3 beses sa isang linggo at maari ring matunghayan sa morning show na Umagang Kay Ganda, sa mga newscast at plug ng ANC at sa online news site na abs-cbnnews.com.